បើរំឮករយៈពេលប្រមាណជា ២០ ឆ្នាំ មុន មហាជននិយមគាំទ្រតារាចម្រៀងប្រចាំផលិតកម្ម SSB ដោយមានលោក ហ្វៃ សំអាង ជាចាងហ្វាងនោះ ប្រាកដជាបានស្គាល់ហើយ លោក ម៉េង ប៊ុនឡូ តារាចម្រៀងមួយរូបក្នុងចំណោមតារាចម្រៀងជាច្រើនទៀតនោះ ។ កាលនោះតារាចម្រៀង ម៉េង ប៊ុនឡូ ក៏ស្ថិតក្នុងលំដាប់តារាប្រុសទទួលបានប្រជាប្រិយភាពខ្លាំងពីអ្នកគាំទ្រ ជាមួយនឹងទឹកដមសំឡេងពីរោះ និង រូបសម្រស់ស្រស់សង្ហារាងខ្ពស់ឌាំងរបស់លោកទៀតផង ។ លើសពីនោះ ដោយដុងសិល្បៈពីកំណើតទាំងការច្រៀង និង សម្តែងដែរនោះ លោក ម៉េង ប៊ុនឡូ ក៏បានសាងកេរ្តិ៍ឈ្មោះនិងខ្សែភាពយន្តដូចជារឿង «ចៅពស់កេងកង» រឿង «មន្តមាយា» និង មានរឿងភាគជាច្រើនទៀត ដែលបានរុញច្រានឱ្យលោកទទួលបានភាពល្បីល្បាញពេញផ្ទៃប្រទេស ។ យ៉ាងណាមិញ ក្រោយពីផលិតកម្ម SSB ត្រូវបានបិទ លោក ម៉េង ប៊ុនឡូ ក៏បានបន្តអាជីពលើវិថីសិល្បៈដូចដើម រហូតដល់អំឡុងឆ្នាំ ២០១៥ ឬ ២០១៦ លោកបានបង្កើតផលិតកម្មខ្លួនឯងឈ្មោះថា BBL Production និង ក្រុមហ៊ុន KS audio Professional Sound ដែលទទួលរៀបចំគ្រប់គ្រងកម្មវិធីប្រគំតន្ត្រីផ្សេងៗ ។ លើសពីនោះ កន្លងមកលោក ម៉េង ប៊ុនឡូ ក៏បានទៅរស់នៅឯសហរដ្ឋអាមេរិកមួយរយៈ និង បានចាប់យកអាជីពជាតារាចម្រៀងដូចដើមនៅទីនោះ ហើយបើក្រឡេកទៅមើលជីវិតគូរបស់លោក ម៉េង ប៊ុនឡូ វិញ សព្វថ្ងៃលោកមានភរិយារួចហើយ ដោយកំពុងតែរស់នៅឯក្រៅប្រទេស ។ មកទល់ពេលនេះ អ្នកទាំង ២ ទទួលបានចំណងស្នេហ៍កូនប្រុសមួយរូបហើយដែរ ដែលមានអាយុ ១ ឆ្នាំ៕
Read Moreបាត់មុខឈឹង ម៉េង ប៊ុនឡូ សំងំសាងក្ដីសុខជាមួយភរិយា និង កូនយ៉ាងស្រស់ស្អាត
